Ji bo Kongreya 19mîn ya Federasyona
Komeleyên Kurdistanê li Swêdê
21-22 Çiriya Pêşîn Sipas
ji bo dawetnameya we. Daxwaza
me ew e ku kongreya we ya 19mîn bi serfirazî derbas bibe û ji bo
çareserkirina problemên kurdên li Swêdê biryarên qenc werbigre.
Hevalên giranbuha; Bêguman
struktura avabûna Federasyonê ji bo hemû kurdan nimuneyeke bêhemba ye ku ev
20 sal in ev nimûne li çar parçeyê Kurdistanê û li ciyên ku kurd li
dijîn olan daye. Ev bîst sal e Federasyon bi mêjiyê Kurdistanî ji bo
kurdên Swêdê û Kurdistanê gelek kar û xebat kiriye û di encama vî karî
de Federasyon îro bûye dezgehekê milî ya kurdan ku meriv pê serbilind e.
Hevalên hêja; Lê
divê meriv êdî li ser kêmasîyên Federasyonê jî vekirî biaxive û
kêmasiyên wê di platformên weha de bi eşkere bîne zimên. Wexta meriv
li rapora xebatê ya Komîteyên Kar mêzê dike, gelek kar hatine kirin, lê di
encama van karan de meriv raporeke berfireh di derheqê karekî konkret de
nabîne. Wek nimûne, Konferansa Stockholmê(di destpêka Hezîrana 2000î) ji
aliyê Federasyonê ve hat organîzekirin, lê Federasyon bi xwe tu teblixat pêşkêşî
konferansê nekir, meriv dikare bi dehan nimûneyên weha ji xebatên organan
derxine. Ji aliyên din xebatên Federasyonê tenê bi Stokholmê re
mahdûtkirî ye û tenê ji aliyê çend kesên Komîteya Karger ve tê
birevebirin.
Di bingeha pirsa Federasyonê de problema kadiran heye. Êdî wext hatiye
û derbas dibe ku divê kadroyên bikêrhatî û pispor ji bo organên
Federasyonê bên hilbijartin.
Kurdên Swêdê piranî hev nas dikin û qabiliyet û zaniyariyên hev dizanin.
Divê di vî warî de ew hev qebûl
bikin û mefispiçûk bin. Divê însanekî zanibe kapasiteya wî têrê çî
dike yan jî nake. Yên ku xwe pêşkêşî organan dikin divê bi
vekirî bibêjin; “Ez amede me di vê organê de kar bikim û filan kar ji
destê min tê”. Bi van tiştan meriv piçûk nabe, bilekis meriv pê
mezin dibe.
Divê kesên ji bo organan bên hilbijartin him taybemendiyê wan hebin û
him jî, jê re pîvan hebin. Divê ew herî hindik him bi niviskî û him jî
devkî zimanê xwe û him jî zimanê swêdî
zanibin, civata xwe û civata Swêdê
nas bikin, hinek ji teknika kominikasyonê fehm bikin, kare komleyetî û
hazirkirina projeyan zanibin, yanî karê ku kirine ser milên xwe divê vî
karî bimeşînin û di karê xwe de fonksiyoner bin. Ne ku bi formalîte
bibin berpirsiyarê komiteyên kar. Wek nimûne divê endamekî Komîteya Karger
ku swêdiya wî/wê qels be, divê
nebe “berpirsê komîteya têkilî bi
swêdiyan re”, yan jî yekî/a ku bi kurdî nizane divê nebe berpirsiyarê
Berbangê, û hwd. Wextê herkes berpirsiyarê karê xwe be, dê kar û barê
serokê Federasyonê jî hêsa bibe û dê ew ê nikaribe têdaxulê karê wan
bike û bi vî hawî him dê kultura demokrasiyê di navbera organan de pêşbikeve
û him jî rekabeta zanyariya kar di nav endaman de zêde bibe.
Hevalên hêja; Di
destpêka 2001î de, dê Swêd dibe berdevkê Yekîtiya Ewrûpayê û di vê
salê de jî di derbarê pêvajoya endambûna Tirkiyeyê ji bo Yekîtiya
Ewrûpayê de hin biryar dê bên wergirtin. Ji bo wê jî, di sala pêşiya
me de barê giran dikeve stuyê Federasyonê. Federasyon divê bi proje û
planên xwe yên xebatê amadekirineke baş bike û ji vê qeysê siûd
werbigre. Di vî warî de em amedene ku piştgiriya we bikin. Em
careke din kongreya we ya 19min silav dikin û di karûbarê de serfirazî
dixwazin.
PADEK
|