v çi edalet e ku milletekî weha gewre û qedîm li ser axa xwe ji bo mafê xwe yê rewa têkoşîn dide û dixwaze ew jî wek milletên din yên dinyayê di parvekirina berpirsiyarî û mikellefetiyê de bibe xwediyê gotin û ev heq jê re nêhê dayîn. Di dinyaya ku maf û azadiya gelan, demokrasî û mafê însanan li ser her tiştî ye, divê ev maf ji kurdan re pirr nehê dîtin!

Di qirnê 21an de hin jî kurd ji mafê xwe yên bingehîn bê par dijîn, hebûna wan nahê qebûl kirin, li ser axa xwe, wek "biyanî" tên hesibîndin. Di nav aramî û aştiyê de nikarin kultura xwe bijîn, zimanê xwe bi kar bînin; derd û kulên xwe jidinyayê re bibêjin. Divê Neteweyên Yekbûyî çareyekî ji halê kurdan re bibîne!

Xwedêgiravî George W. Bush xwe kiriye xwediyê dinyayê û dixwaze li ser prensipên Wilson pirsên gelan "çareser" bike, divê ew berî li ser pirsa kurdî raweste, hewil bide ku wê çareser bike; divê berî zixtê li mutefika xwe yê Tirkiyeyê bike ku ew heq û hiqûqên kurdan qebûl bikin, hebûna wan bi zaqonên bingehîn misoger bikin, kurd bi aramî û aştî nirxên xwe pêşve bibin; bi resmî û mahneya wê Newrozê pîroz bikin.

Xwdêgiravî di pêvajoya Yekîtiya Ewrûpayê de Tirkiye divê gavên demokratîk bavêje, asteng û keleman ji pêşiya pêşketina xwe rake û bibe welatekî demokratîk. Lê ew hîn jî partiyên siyasî û rêxistinên demokratik, pişeyî, sivîl digrin û yasaxê di derheqê birîvebir û endamê wan de derdixînin. Divê Yekîtiya Ewrûpayê berandama xwe ya Tirkiyeyê neke endama xwe ya esil heta ku ew mafên rewa yên kurdan qebûl neke; azadiya raman û rêxistinî di jiyanê de bi kar neyne, demokrasiyê bi rê û rêbazên wê neke jiyanê.

Dewleta tirk siyaseteka înkar û asimlasiyonê li dijî "kurdên xwe" û li dijî "ehlên" wan yê başûr jî siyaseteka hovane û çavtirsandinê dimeşîne. Tirkiye bi her hawî dixwaze desttêwerdana başûr bike û di vî warî de bêmubaxele hemû dezhegên wan hemfikir in. Bi destpêkirina şer Meclîsa Tirkiyeyê bi lez û bez tezkere derxist ku leşkerên xwe têxe Kurdistana azad. Ew naxwazin kurd li tu derî mafên xwe bi dest bixin. Bi destxistina mafê kurdan ji bo dewleta wan dibe sedemê şer. Lê bi desttêwerdana Tirkiyeyê ya başûrê welêt, dê birîneka kûr di navbera herdû miletan de veke ku ev birîn dê zû bi zû neyê tedawî kirin. Tirk dê ji bin vê berpirsiyariyê nikaribin derkevin û ew li ser eniya wan wek lekeyek bimîne! Divê YE rê nede ku berandameka wan bi armanca dagirkeriyê bikeve axa ciranê xwe. Divê kurdên bakûr jî wek birayên xwe yên başûr bi her hawî li dijî desttêwerdana Tirkiyeyê bisekinin da ku ew leşkerên xwe neşînin başûrê welêt. Îro roj roja xîretê ye; firsendeka tarîxî ketiye destê kurdan divê ji wê siûd bê wergirtin.

Îro pergela dinyayê serûbin û li bin guhê hev ketiye. Dezgehên heyî wek NY, YE û NATO pêşeroja wan ber bi şêlûbûnê ve diçin. Amerika û mutefikên wê Ingiltere û Ispanya û çend dewletên din ku hemû bi hevre du tiliyên destan derbas nakin guh nadin biryarên NY ê ya jî biryarên wê wek xwe şîrove dikin û îradeya gelan îhlal dikin ku Rohilata navin dizayin bikin. Lê xeteriya vê riyê dibe ku ji bo kurdên başûrê welêt bi "xêr" be. Mesajên ku ji aliyê berpirsiyarên Amerikayê ve di derheqa krîza Iraqê de heta nuha hatine dayin xweşbîniyek destnîşan didin ku kurdên başûr di Iraqa piştî Saddamî de bibin xwediyê statuyeka resmî ya huqûqî û di armancên xwe de bi ser kevin! Lê li Rohilata navîn zemîna siyasetê şemetok e û bi deqûdolaban dagirtîye. Kurd îro li ser axa xwe hêzaka xurt in, divê ew di vî şerî de nek(b)in "kurdan"(darikê diranan) . Divê kurd di belgeyên niviskî ku pêşeroja wan misoger bikin de, bi israr bin.

Şer li derveyî YN û li derveyî îradeya kurdan dest pê kir, kurd bi hiqûqî ne teref in ku di platformên navneteweyî de bibin muhetab, lê ew di şerî de teref in û hêza herî xurt in ku di duweroja Iraqê de rola xwe bilîzin. Hêzên başûr heta niha siyaseteka bi biryardar û bi îstîkrar meşandin û siyaseta wan bi dilê gellek kurdan e; divê em kurdên din piştgir û duadarê wan bin. Wek endamê politburoya PDK û cîgirserokê hukûmeta herêma Kurdistanê Samî Abdurrehman dibêje; " Ew di jiyana xwe de du car bûye dîdarê xiyaneta Amerîkayê", ku ev car nebe cara sêyem dê xeyalên me bibin rastî û em jî bibin endamêka malbata cihanê!